TambalangBinisaya

Ako si KabayoNiAdan, motiyabaw kung sakyan, naningkamot nga makahatag og luna adtong buot mohisgot sa atong pagka-Bisaya.

Daghan na usab akong nabasahan ug natun-an bahin sa atong kasaysayan ug kultura isip Bisaya. Apan ang atong paghatag og kahulogan niini nagpadayon paglambo subay sa atong paggamit niini sa atong kinabuhi. Unsa man kini para kanimo, higala ? Giunsa man kini nimo gihatagan og kinabuhi ang imong pagka-ikaw... ?


Tambalan... mao kini misantop dayon sa akong huna-huna. Bitaw... naay mga butang nga dili mahunahunaan kung walay apan sa atong balatian. Sa dihang adunay ngutngut o ul-ol o di masabtang balatian, mahunahunaan dayon nato ang atong Tambalan... Sus, magpahilot tingale ko kay murag nabutdan ang akong tiyan.... o gipanuhot man akong kabukogan.

Ingon pud niana akong tan-aw sa atong pagka-Bisaya... dili nato masabtan hangtud kini masaburan... Sama sa awit nga nagkanayon, " Ayaw hikapa ang bulak ... "

Ug tungod kay dugay na pud kita diri sa gawas sa Kabisayaan, kanunay nato masugatan ang atong kinaiya nga nalahi man sa uban. Nganong mas direkta man ang atong tinubagan ? Nganong maglagot man kita sa mga pasumbingay daw nagpakaron-ingnon. Nganong dili man nato maantos ang hambog ni Tonyo ? Nganong malipayon man kita sa kinabuhing yano ...

Apan sa laing bahin, kung mouli na pud kita... makalagot pud hunahunaon nga lahi na man pud ang pagka-Bisaya sa atoa... Lisod pud nato masakyan...

Matud pa sa usa ka higala sa Luxembourg... na mestizo na tingale ta.... BisDutch.... Bis(Ger)Man.... Bis(Belgi)An... Bis(Eng)Lis... ug unsa pa...

Basta... sa akong paghandum... Bisaya kaayo akong pamati kung makulingling ko sa akong kudyapi (aw gitara diay). O di kaha, maglan-lan og ginamos o bulad o amahong ... Usahay bation ko kini kung madunggan ang pulog nga pwerte gyung ispisoha sama sa:

1. Tagulilong- gikan sa pulong nga "tago" (hide) ug "lilong" (keep secret) ...
2. Taking-king (limping) versus Kinto (tiptoe) ...
3. Naglagot vs. Nagmahay vs. Nalain vs. Nangluod vs. Nasina ...

Di ba... O ako ra ba naghunahuna og ingon niini ? Nahala tubaga....